Summary:

Denne studien tek føre seg den fyste omorganiseringa i Arbeids- og velferdsdirektoratet etter at NAV reforma vart innført i 2006. Studien er ei prosessuell tilnærming til studie av endring og ser på ein planlagt endringsprosess. For å skildre endringsprosessen tek eg utgangspunkt i ein straumdragstankegang (garbage-can modell) som overordna analytisk rammeverk med fokus på aktiverings- og defineringsprosessen. Det heile endar ut i to tilnærmingar til endring, "top-down" og "bottom-up". Vidare blir det nytta tre forklarande perspektiv; organisering og endring som analytisk problem, organisering og endring gjennom interessehevding og kjøpslåing og organisering og endring som regelfølging. Det fyrste perspektivet vil her ha ei form for forrang sida det er ein planlagt endringsprosess som vert studert. Studien viser at det generelt har vore ein leiarstyrd prosess, både når det kjem til kven som får delta i prosessen og kva endringsforslag som blir tatt opp og drøfta. Fagforeiningane har delteke formelt, men har hatt lita reell medverknad i prosessen. Leiinga gjekk tidleg ut og lova dei tilsette høg grad av medverknad, men det vart ikkje heilt realiteten. Endringsprosessen har blitt sterkt kritisert av fleire fagforeiningar og NTL NAV har slått fast i eit fråsegn på medlemsmøte at NAV ikkje kan vere seg kjend av ei slik gjennomføring som her har vore tilfellet, då dei burde opptre som eksempel til etterfølje. Det var særleg i samband med opprettinga av ei eiga eining etter forhandlingane om organisasjonskart som skapte uro og frustrasjon blant dei tilsette.